ഓണം പ്രമാണിച്ച് വമ്പിച്ച വിലക്കുറവ് : ബ്ലോഗ് ചന്ത

ബ്ലോഗില്‍ അനുദിനം വര്‍ദ്ധിച്ച് കൊണ്ടിരിക്കുന്ന നിത്യോപയോഗ സാധനങ്ങളുടെ വിലക്കയറ്റം പിടിച്ചു നിര്‍ത്തുന്നതിനായി സര്‍ക്കാര്‍ ഏര്‍പ്പാടാക്കിയ പുതിയ ബ്ലോഗ് ചന്തയിലെ വിലവിവര പട്ടിക ഇപ്രകാരമായി സര്‍ക്കാര്‍ അംഗീകരിച്ചിരിക്കുന്നു. ആയതിനാല്‍ കരിഞ്ചന്തക്കാരുടേയും പൂഴ്ത്തി വെപ്പുകാരുടേയും ചതിയില്‍ പെട്ടുപോകാതെ എല്ലാവരും ബ്ലൊഗ് ചന്തയില്‍ നിന്ന് തന്നെ അവശ്യസാധനങ്ങള്‍ വാങ്ങേണ്ടതാണ് എന്ന് ഇതിനാല്‍ എല്ലാ ബ്ലോഗര്‍മാരേയും അറിയിച്ച് കൊള്ളുന്നു.ഈ ഓണത്തിന് എല്ലാവരും ബ്ലോഗച്ചന്തയില്‍ നിന്ന് സാധനങ്ങള്‍ വാങ്ങൂ, ഈ ഓണം ഞങ്ങളോടൊപ്പം ആഘോഷിക്കൂ...

സര്‍ക്കാര്‍ അംഗീകരിച്ച ബ്ലോഗ് ചന്ത വിലവിവര പട്ടിക.

സ്മൈലി :) ----------------- 5 രൂപ
കൊള്ളാം ------------------ 10 രൂപ
കിടിലന്‍ ------------------- 12 രൂപ(രണ്ട് ‘കിടിലന്‍’ വാങ്ങുമ്പോള്‍ ഒരു “കിടു” സൌജന്യം)
നന്നായിട്ടുണ്ട് --------------- 15 രൂപ
തകര്‍ത്തു ------------------- 16 രൂപ
ഇനിയും എഴുതൂ -------------- 20 രൂപ
കൂടെയുണ്ടേ-------------------12രൂപ
ബാക്കി പോരട്ടെ! ‌------------ 21.50രൂപ
അതിമനോഹരം ------------- 25 രൂപ
അതിരസകരം --------------- 27 രൂപ
കലക്കി മോനേ -------------- 30 രൂപ
നല്ല ചിത്രം ------------------ 25 രൂപ
പടം കൊള്ളാം --------------- 25.50
കിടിലന്‍ പടം --------------- 27 രൂപ
ഹ ഹ ഹ ഹ ----------------- ‘ഹ’ ഒന്നിന് 2 രൂപ('ഹി' സ്റ്റോക്ക്‌ തീര്‍ന്നു)
ചിരിപ്പിച്ചു ------------------- 30 രൂപ
നമിച്ചിരിക്കുന്നു -------------- 50 രൂപ
നൊമ്പരപ്പെടുത്തി ------------ 35 രൂപ
ആശംസകള്‍ -----------------18 രൂപ

ഓണം സ്പെഷല്‍ ഓഫറുകള്‍:-

‘ഫോളോവര്‍ ഒന്നിന് 150 രൂപമാത്രം!
അഞ്ചു ‘ഫോളോവേര്‍സിനെ‘ ഒന്നിച്ച് വാങ്ങുമ്പോള്‍ നൂറ് ‘ഫോളോവേര്‍സ്’ തികയുമ്പോള്‍ കത്തിക്കാനുള്ള മെഴുകുതിരിയും, പായസ കിറ്റും തികച്ചും സൌജന്യം.

പുതിയ പോസ്റ്റിന്റെ ലിങ്ക് മെയില്‍ അയക്കാന്‍, മെയിലൊന്നിന് 10 രൂപ മാത്രം!!
നൂറ് മെയില്‍ ഒന്നിച്ചയക്കുമ്പോള്‍ ഒരു “ഫോട്ടോ പോസ്റ്റ്”ലിങ്ക് തികച്ചും സൌജന്യമായി മെയിലില്‍ അറിയിപ്പ് നല്‍കുന്നു.

“ഓണം കമന്റ് കിറ്റ്”
1000 രൂപയടച്ച് ഒരു കമന്റ് കിറ്റ് സ്വന്തമാക്കുമ്പോള്‍ വര്‍ഷം മുഴുവനും ഇഷ്ടമുള്ള പോസ്റ്റുകളില്‍ ഒരു വര്‍ഷത്തേക്ക് കമന്റുകള്‍ സൌജന്യമായി ഇടുന്നു. കിറ്റിന്റെ കൂടെ “പുകഴ്ത്തല്‍ കമന്റ് പായ്ക്കും, ഇകഴ്ത്തല്‍ കമന്റ് പായ്ക്കും തികച്ചും ബോണസായി ലഭിക്കുന്നു.

ഈ ഓണം ബ്ലോഗ് ചന്തയോടൊപ്പം ആഘോഷിക്കൂ......
********************************************************

“അധോബ്ലോഗം“ ചന്തയില്‍ നിന്നുമുള്ള ഏറ്റവും പുതിയ ഓണം ഓഫറുകള്‍!

അനോണി കമന്റ് ഇടാന്‍ ---------------------15 രൂപ
അണോണി തെറി വിളി ----------------------50 രൂപ
ബ്ലോഗ് പൂട്ടിക്കാന്‍ ---------------------------250 രൂപ
അപര ബ്ലോഗ് നിര്‍മ്മിക്കാന്‍------------------500 രൂപ
വ്യാജ പ്രൊഫൈല്‍ ഉണ്ടാക്കാന്‍---------------100 രൂപ
ഒരേ പോസ്റ്റില്‍ പല പേരില്‍ കമന്റ് ഇടാന്‍-----100 രൂപകമന്റ് ഒന്നിന്.
വധ ഭീഷണി കമന്റ്/ ഇ മെയില്‍---------------250 രൂപ
വിവാദ പോസ്റ്റ് ഇടാന്‍ ------------------------100 രൂപ
വിവാദ കമന്റ് ഇടാന്‍--------------------------25 രൂപ
ഗ്രൂപ്പ് ബ്ലോഗ് തകര്‍ക്കാന്‍ ---------------------500 രൂപ
‘ഫോളോവറെ’ പിന്തിരിപ്പിക്കാന്‍ --------------200 രൂപ

ഈ ഓഫറുകള്‍ ഓണക്കാലത്തേയ്ക്കു മാത്രം. പരിമിതമായ സ്റ്റോക്ക് മാത്രം!
ഈ ഓണം അധോബ്ലോഗത്തോടൊപ്പം ആഘോഷിക്കുക!!

ആവശ്യമുണ്ട്:

അധോബ്ലോഗത്തിന്റെ തിരുവനന്തപുരം വ്യാപര കേന്ദ്രത്തിലേക്ക് പരിചയ സമ്പന്നനായ സെയിത്സ്മാനെ/സെയിത്സ് ഗേളിനെ ആവശ്യമുണ്ട്. താഴെ കാണുന്ന യോഗ്യതകള്‍ ഉള്ളവര്‍ എത്രയും വേഗം ബയോഡാറ്റ സഹിതം നേരില്‍ ബന്ധപ്പെടുക.

തസ്തിക: സെയിത്സ് മാന്‍/ഗേള്‍
വയസ്സു : ആവശ്യത്തിന്.
വിദ്യഭ്യാസ യോഗ്യത : മൂന്നാം തരം പാസ്
ശമ്പള സ്കെയില്‍: ആളെ കണ്ടതിന് ശേഷം സ്കെയില്‍ വെച്ച് അളന്ന് തിട്ടപ്പെടുത്തും.
പ്രവര്‍ത്തി പരിചയം:
1. ഒരു അനോണി ബ്ലോഗില്‍ ചുരുങ്ങിയതു ഒരു വര്‍ഷത്തെ പോസ്റ്റ് ചെയ്ത പരിചയം.
2. പത്തില്‍ കുറയാത്ത കമന്റ് തെറികളിലുള്ള പരിജ്ഞാനം
3. ഇതിനു മുന്‍പ് നടത്തിയ തെറി കമന്റ്, എതെങ്കിലും ബ്ലോഗര്‍ സാക്ഷ്യപ്പെടുത്തിയ സര്‍ട്ടിഫിക്കേറ്റ്.
4. ഏതെങ്കിലും ബ്ലോഗ് പൂട്ടിച്ചവര്‍ക്ക് മുന്‍ ഗണന ലഭിക്കാന്‍, പൂട്ടിച്ച ബ്ലോഗിന്റെ പ്രൊഫൈല്‍ കോപ്പി അറ്റസ്റ്റ് ചെയ്തത് അപേക്ഷയോടൊപ്പം വെയ്ക്കുക.
5. വിവാദ പോസ്റ്റുകള്‍ സ്ഥിരമായി ഇടുന്ന ചുരുങ്ങിയ പക്ഷം നാലു ബ്ലോഗര്‍മാരെയെങ്കിലും ഇന്റര്‍വ്യൂ ചെയ്തതിന്റെ ബൂലോക പത്ര കട്ടിങ്സ് അപേക്ഷയോടൊപ്പം അറ്റാച്ച് ചെയ്യുക.

മുകളില്‍ പറഞ്ഞ യോഗ്യത ഉള്ളവര്‍ എത്രയും വേഗം അധോബ്ലോഗം ഒഫീസുമായി ബന്ധപ്പെടുക.
അഡ്രസ്:
പ്രസിഡന്റ്,
അധോബ്ലോഗം,
തിരുവനന്തപുരം വടക്ക്.
ഫോണ്‍: 9989547100